Saltar para: Post [1], Pesquisa e Arquivos [2]




Knipsel.PNGsdd.png

 

Sónia Tavares Robalo, máz conxedu pa Preta Tembless, di 21 anu de idadi, qui ta vive atualmenti na Genebra, Suíça, i ta trabadja comu assistenti di enfermagem, “cai, literalmenti, na graça” di cabo-verdianus, ku si humor refinadu k ta lebanu a identifica ou relaciona situaçons di dia-a-dia ku maioria di sez vídeos na si página di Facebook “Cabo-verdiano é Si”.

 

Proporçon k dja refleti na kes 18.000 “gostos” na si página di facebook em poku tempu e pa kel merecidu vitória na 1ª ediçon di concursu di talentus promovidu pa página Do You Papia Kriolu?, undi ki Sonia konkorri djuntu ku várius otus candidatus di talentus diferenciadus.

 

Importanti di fla, qui kel dinheru qui el ganha na konkursu “Do you… ten talentu?” (300 euro), Sonia pidi pa (DYPK) promotoris di concurso entrega es quantia na 2 familias ki sta passa necessidades na Cabo Verde. Kes li è familias ké odja na videos di programa “Coraçao de Ouro” ki foi partilhado na Facebook. Para além di talentu Sonia ta carrega tambe um coraçon bondozo.

 

Na um entrevista pa Nôs Rascunhos, Sonia respondi alguns perguntas:

 

Nôs Rascunhos: Comédia sempri fazi parti di bu vida? Quandu ki bu da conta ki bu tem jetu pa fazi otus alguém ri?
Sónia Tavares: Sempri nfoi trocenta djuntu ku nha midjor amiga ki txoma Pikinoty. Nu ta fazeba músicas i nu ta riba ti nu ka podeba más! Sempri nconsegui fazi otus alguém ri ku nha manera di fala i di ser.

 

NR: Undi ki surgi ideia di kumeça produzi vídeos pa internet? Contanu um poku modi ki tudu kumeça.
Sónia Tavares: Foi por akasu. Nha primeru Vine foi “nu bai”. Sempri ta odjaba na Instagram kez famosus Vines americanus i nreparaba ma ninhum cabo-verdianu ou discendenti ka ta fazeba nada sobre nós cultura na altura. I, ndicidi fazel. Ntinha postadu na anu passadu mas ncaba pa tral pamodi n´atxa ma ka staba mutu fixi. Nkumeça ta odja kuzas ki Nuno Lokura i Carlos Andrade sta fazeba. Dipos di ser motivada pa nha mana Lucete nvolta posta i fazi máz vídeos. Si ki tudo começa…



NR: Kez Sketches ki normalmente bu ta fazi é vídeos de curta-duraçon undi bu ta consigui poi monti alguém ta ri. Na kuzé ki bu ta inspira pa fazi kez vídeos la?
Sónia Tavares: Maioria é baseadu na factus reais. Factus ki ta contici ku mi ou ku otus alguém. Mi e txeu observadora i nkonxi maioria di kez falas na criolu… Nta muda alguns kuzas na cada vídeo pa kez alguém k nbasia ka rikunheci.

 

NR: Mo ki tem sido feeback di públicu em relaçon a buz vídeos?
Sónia Tavares: Em geral é positivu. Mas é moda tudu ki nu ta fazi, alguns vídeos tem piadas e otus nau.

 

NR: Buz pais ta apoia kel ki bu ta fazi? Kuzé kez ta flau?
Sónia Tavares: Êz ta ri. Êz ta atxa piada i ez ta contribui ku stórias di sez infância kez ta contam. Apesar di ez ta atxam meiu maluca, ez ta apoiam sempri.



NR: Ás vez comediantis, mesmu na momentus de seriedadi, ka ta lebadu mutu asériu. Tem acontecidu ku bo?


Sónia Tavares: Nau, nunca. Nsabi fazi o “aparte” di kuzas. I kez ki konxem nem ka ta atxam assim tao engraçada horas ki nta fala sériu.


NR: Kal ké bu sonhu em termus de produçon di Sketches? Bu sta pritendi lebal más a sériu ou por enquanto, é algu espontâneo?


Sónia Tavares: É algu espontâneo, mas nsta aberta a prupostas. Céu é limite!

 

NR: ‘Do you Ten Talentu?”. Foi bu ideia participa na concursu? Kal ké sensaçon di ser rekunhecida como midjor di tudo otus?


Sónia Tavares: Nparticipa pamodi um minina mandam mensagem dipós di odja nhas vídeos i el incentivam pam inscrevi. Nta aproveita pa agradecel.
Sensaçon?!… É bom ser rekunhecida pa kuzas ki nu ta fazi mas nsabe ma cada um di nós tem talentu sicundidu e nós tudu tem capacidade de ser kel midjor. Nta atxa ma mi é más um entre tudu midjores.

 

NR: Ku kez vídeos ki bu ta fazi bu ganha munti fãs. Dexa alguns palavras pa kez k ta adimirou.
Sónia Tavares: Nta agradeci txeu mesmo pa apoius, pa mensagens, pa críticas e pa carinhus pamodi ka tem más palavras i mi nka ta txomaz di fan, nta prefiri txomaz di compatriotas.

Perguntas “clichês”

1 – NR: Um virtudi?
Sónia Tavares: Simplis

2 – NR: Um difeitu?
Sónia Tavares: Temosa

3 – NR: Bu cor priferidu?
Sónia Tavares: Pretu

4 – NR: Um música priferidu?
Sónia Tavares: Dimokrasia de Mayra Andrade

5 – NR: Um cantor(a) preferidu?
Sónia Tavares: Orlando Pantera

6 – NR: Um filme/série preferidu?
Sónia Tavares: Orange Is the New Black

7 – NR: Um Ídolu?
Sónia Tavares: Nha avó

8 – NR: Família é…
Sónia Tavares: tudu pa mi

9 – NR: Deus é…
Sónia Tavares: tudu ki mi é hoji

10 – NR: Comédia é…
Sónia Tavares: onda pusitivo

 

Pàgina di Facebook di Sonia, “Caboverdianos è si: Cabo-verdiano é Si

 

DYPK

PODERÁ TAMBÉM GOSTAR DE:

Autoria e outros dados (tags, etc)

publicado às 12:36










Alguma sugestão em relação ao nosso Blog?